КъБР-м и Iэтащхьэ КIуэкIуэ Ю. А. зэIущIэ щригъэкIуэкIащ 2017 гъэм бадзэуэгъуэм и 5-м псы­дзэр къыщехам щыгъуэ зи лъакъуэр фIилъэсыкIа лъэмыжыр зэгъэпэщы­жыным щелэжь щIыпIэм деж. Псы икIыпIэм деж федеральнэ гъуэгум щызекIуэ транспортыр щызэтримыхьэн папщIэ 2017 гъэм дыгъэгъазэм и пэ­щIэдзэм пIалъэкIэ къагъэсэбэпыну гъущI лъэ­мыж тралъхьауэ щытащ.

Ятха къэрал контрактым къызэрыщыгъэлъэгъуамкIэ, лэжьыгъэхэр 2019 гъэм и мазаем зэфIэкIын хуейщ. Ауэ республикэм и уна­фэщIым къигъэуващ Iуэ­хум еужьэрэкIыну икIи дызэрыт илъэсым и щэкIуэгъуэ мазэм фIэмыкIыу лъэмыжыр къызэIуахы­жыну.

ЗэIущIэм хэтащ КъБР-м ухуэныгъэмрэ гъуэгу хозяйствэмкIэ и министр ­Къуныжь В. Хь., «Кавказ» гъуэгур зехьэнымкIэ управленэ» федеральнэ кIэзонэ IуэхущIапIэм и уна­фэщIым и къуэдзэ Гулаков В. В., Шэджэм муниципальнэ районым и щIына­- лъэ администрацэм и Iэтащхьэ ТекIушэ А. А., подряд IуэхущIапIэхэм я унафэщI­хэр.